Өзбекстанда балдар арасындагы өлүмгө дары себеп экендиги айтылды. Министрлик чечим чыгарды
Өзбекстанда балдар арасында катталган жапырт өлүмдү "Док-1 Макс" дарысы менен байланыштырууда. Мындан улам Саламаттыкты сактоо министрлигинин Дары-дармек жана медициналык каражаттар департаменти билдирүү жасады.
Департаменттин маалыматы боюнча, "Док-1 Макс" индиялык өндүрүштөгү комбинацияланган дары болуп саналат. Дарынын курамында активдүү заттар бар: парацетамол, гвайфеназин, фенилэфрин. Ал баш оору, ангина, жөтөл, калтыроо менен коштолгон курч респиратордук вирустук инфекцияларды жана сасык тумоону дарылоо үчүн көрсөтүлгөн.
"Док-1 Макс" таблетка жана сироп түрүндө чыгарылат. Аталган дары каражаты Кыргызстанда 2018-жылы катталган, акыркы жолу 2021-жылы импорттолгон, 2022-жылы өлкөгө импорт болгон эмес.
Коңшу өлкөдөгү кырдаалды эске алуу менен "Док-1 Макс" дарысын 2022-жылдын 23-декабрынан тартып Кыргыз Республикасынын аймагында сатууну убактылуу токтотуу чечими кабыл алынды. Ошондой эле лабораториялык талдоо жүргүзүү үчүн үлгүлөр алынды", - дешет мекемеден.
Дары-дармек жана медициналык каражаттар департаментинен кошумчалашкандай, "Док-1 Макс" дарысынын терс тассирлери боюнча бир да арыз билдирүү түшкөн эмес. Эгер дарыны колдонгондон кийин терс таасирлер байкалса кабар берүүнү жарандарга эскертет. Байланыш үчүн номер: 0800 800 26 26.
