Президенттин басма сөз кызматынын башчысы мамлекеттик уюлдук операторго өтүүгө чакырды
Президенттин маалыматтык саясат бөлүмүнүн башчысы Дайырбек Орунбеков кыргызстандыктарды Mega уюлдук операторуна өтүүгө чакырат. Ал социалдык тармактагы баракчасына үй-бүлөсүнүн бардык мүчөлөрү мамлекеттик оператордун кызматынан пайдаланарын жазды.
"Башкаларды дагы мамлекеттик уюлдук операторго өтүүгө чакырам. Ага түшкөн пайда, кирешелери мамлекетке калат. Мамлекетке көп каражат түшсө - айлык, жөлөк пул, пенсиянин көлөмү өсөт. Мектептер дагы көп курулат, жолдор салынат. Мекенди сүйүү жөнөкөй эле - Mega`нын кызматын пайдалан", - деп жазат ал.
Эске салсак, мамлекеттик бюджеттин эсебинен айлык алгандар, анын ичинде мамлекеттик кызматкерлер, мугалимдер жана дарыгерлер үчүн MegaCom ата мекендик операторуна өтүү боюнча ачык-айкын эмес көрсөтмө былтыр берилген. Бирок министрлер кабинети бул маалыматты расмий тастыктаган эмес.
